Pro 17 | NdeIBE | STEP | Lungcono uqweqwe lwesinkwa umuntu elokuthula, kulendlu egcwele amagqibhagqibha okudla kodwa kulengxabano.

Proverbs 17

1 Lungcono uqweqwe lwesinkwa umuntu elokuthula, kulendlu egcwele amagqibhagqibha okudla kodwa kulengxabano.

2 Isisebenzi esihlakaniphileyo sizabusa indodana eyangisayo, sizakwabelwa ilifa njengomunye wamadodana.

3 Umcenge ngowokutshisa isiliva lesithando ngesokutshisela igolide, kodwa uJehova uhlola inhliziyo.

4 Umuntu oxhwalileyo uyazilalela izindebe ezimbi; lomqambimanga uyalulalela ulimi olulomona.

5 Lowo ohleka umyanga weyisa uMenzi wakhe; oklolodayo nxa konakele kayikuphepha isijeziso.

6 Abazukulu bangumqhele wabalupheleyo, njalo labantwana baziqhenya ngabazali babo.

7 Izindebe zokutshinga azisifanelanga isiwula – pho-ke zimbi kangakanani izindebe zamanga kumbusi!

8 Isivalamlomo siyintelezi kulowo osinikayo; uyaphumelela kukho konke.

9 Ofihla ukona komunye uqinisa umthandano, kodwa okuhlazululayo wehlukanisa abangane abasekhwapheni.

10 Ukukhuza kuyamqondisa umuntu olengqondo kulokutshaya izimvimvinya ezilikhulu.

11 Umuntu omubi udinga ukuhlamuka kuphela; uzathunyelwa inxusa elilesihluku.

12 Kungcono ukuqondana lesilo esithathelwe imidlwane yaso kulokuhlangana lesiwula ebuwuleni baso.

13 Nxa umuntu ephindisela okuhle ngobubi, ububi kabusoze basuka endlini yakhe.

14 Ukusungula inkani kunjengokubhidliza umduli wedamu; ngakho yekela indaba ingakadaleki nkani.

15 Ukukhulula olecala lokugweba omsulwa – uJehova uyakuzonda kokubili.

16 Isizani imali esandleni sesiwula, sivele singatshisekeli ukuzuza ukuhlakanipha?

17 Umngane ulothando ngezikhathi zonke, lomzalwane uzalelwa izikhathi zenhlupheko.

18 Umuntu ongananzeleliyo uyaziwisela anike isibambiso enceda umakhelwane wakhe.

19 Lowo othanda inkani uthanda isono; lowo owakha isango eliphakemeyo udinga ukubhidlizwa.

20 Umuntu olenhliziyo exhwalileyo kaphumeleli; lowo olimi lwakhe luyakhohlisa uwela ekuhluphekeni.

21 Ukuba lendodana eyisiwula kuthelela usizi; akulakuthokoza kuyise wesiwula.

22 Inhliziyo ethokozayo ingumuthi omuhle, kodwa umoya owephukileyo womisa amathambo.

23 Umuntu omubi wamukela isivalamlomo ensitha ukuze ahlanekele indlela yokwahlulela.

24 Umuntu ohluzisisayo izinto ukhokhelwa yikuhlakanipha, kodwa amehlo esiwula asabalala afike ekucineni komhlaba.

25 Indodana eyisiwula ithelela uyise usizi lokudabuka kulowo owayizalayo.

26 Kakukuhle ukujezisa umuntu ongelacala, loba ukufaka uswazi izisebenzi ngenxa yobuqotho bazo.

27 Umuntu ololwazi ubeka kuhle amazwi akhe ngokunanzelela, njalo umuntu ozwisisayo kasilo icaphucaphu.

28 Lesiwula kuthiwa sihlakaniphile nxa sithule, kuthiwe siyaqedisisa nxa sibamba ulimi lwaso.